ماهي متطلبات ناسا عشان تصير رائد فضاء عندهم؟

نحنا دائماً نشوف رواد الفضاء وهم يسبحوا في محطة الفضاء الدولية , ونشوفهم وهم قاعدين يلعبو في كمبيوتراتهم أو بياخذوا صور للأرض , أو يخرجو برة المحطة الفضائية عشان يتمشو شوية. ونظن أنه الموضوع ممتع أو شيء من هذا القبيل , ولكن في الحقيقة لحظة وجود رائد الفضاء في المحطة الفضائية العالمية هي جزء بسيط جداً لايذكر من حياة رائد الفضاء المهنية ككل. 

ما أعرف صراحة ايش الحكاية من وراء الصورة هذه , ولكن اعتقد انها مضحكة

في وكالة ناسا الفضائية في الولايات المتحدة , عشان تصير رائد فضاء لازم أول شيء تعدّي لجنة الاختيار التي تِطلُب مِنك أن تكون مواطن امريكي , ولازم يكون عندك شهادة ماجستير في أي تخصص علمي أو هندسي , أو شهادة طب وخبرة سنتين في مجال تخصصك أو مكمل ألف ساعة طيران لطيارة نفاثة حربية. ولازم يكون طولك بين 187 سنتيمتر أو 155 سنتي متر , فطلبك راح يترفض اوتوماتيك. ولازم تعدي اختبار حدة العيون بحيث عينك تكون 20 على 20 لكل عين للأجسام البعيدة والقريبة. وأخيراً , لازم تكون لائق جسدياً.

هل يكفي انك تعدي المتطلبات المبدئية هذه؟ طبعاً لا , في 2015 , أتقدم حوالي 18 ألف شخص عشان يصيروا رواد فضاء , ومن الـ 18 ألف شخص هذول , 4800 شخص اجتازوا المتطلبات المبدئية هذه. فعشان يِنزُل عدد المُتقدّمين ، ناسا تطالع في ماوراء مُؤهلات الشخص ، كهواياته وإنجازاته الشخصية وانجازاته في الدوام ، ومعلوماته التِقنية والعامة ، وخبراته في كل موضوع ممكن ، وفي إيش يفكر لما يكون فاضي. وهذا بينزل من عدد المقبولين الى 500 متقدم.

اذا عديت كل هذه الأمور ، ناسا راح تتواصل معاك عشان تعمل معاك مقابلة شخصية ومع أي شخص آخر من أعلى المتقدمين في نتايج الاختبارات المبدئية. ولكن فقط 120 شخص أو أقل من الـ 500 المتقدم. ، ونصف اللي أتعمل معاهم مقابلة أولى راح يَعملوا معاهم مقابلة ثانية أخيرة , يعني 60 متقدم فقط. النصف اللي ما انقبل بيروحوا بيوتهم ويرجعوا لحياتهم الطبيعية. الـ 60 متقدم الآن بيعملو عليهم كل انواع الاختبارات الجسدية والفكرية والتي راح تحدد بواسطتها مناسبتهم للبرنامج الفضائي أو لا.

دفعة 2017 من رواد الفضاء الجدد في وكالة ناسا – حالياً يوجد 44 رائد فضاء جاهز لأداء أي مهمة في الفضاء

الفحص الجسدي حيكون شامل لكل شيء فقط عشان يحصلّوا حدود اجسام المتقدمين الفيزيائية وفين ممكن يوصلوا تحت ظروف الاختبار. ومن هذه الاختبارات الجسدية الطويلة واللي تحاكي فترات الطيران الطويلة المُرهِقة ، 14 فقط سوف يجتازوا المرحلة هذه. مافي أي مجال للواسطة هنا. هذه المجموعة هي المجموعة اللي راح تطلع للفضاء. عفواً ، اللي راح يكون عندها “فرصة” انها تطلع للفضاء.

بس هل خلاص يقدرو يحطوهم على صاروخ ويرسلوهم في الفضاء؟ ههههه لسة. الجزء السهل عدّى , والآن بدأ الجزء الصعب على شكل برنامج اعدادي طول فترته سنتين. وفيها يجهزوا رواد الفضاء للفضاء عن طريق عدة برامج تدريبية.

الـ 14 المرشّحين راح يتعينوا في مكتب رواد الفضاء في مركز كينيدي للفضاء ، وهناك حيَدّرِبُوهم على حاجات كثير ، أول هذه الأمور هي انهم لازم يتعلموا كيف يعيشوا براحة في بيئة مائية. لازم الكل يصير غاطس سكوبا برخصة سارية. بس هل الغطس هنا لُمجرد انهم فقط يصعبوا حياة رواد الفضاء لا اكتر؟ اكيد لا , لازم الكل يكون مرخص انه يغطس بأنبوبة اكسجين أولاً بسبب انه الكل لازم يعتاد الشغل والعمل وهو لابس قفازات ثقيلة ومع وزن شبه منعدم ، بالإضافة لأنه لاحقاً بيدربوهم على العمل تحت الماء ببدلة فضائية كاملة.

ولكن قبل مايبدأوا تدريب السبيس ووك ، او تدريب مشية الفضاء ، لازم أول شي يجتازوا اختبار السباحة واللي يلزمهم انهم يسبحوا 75 متر بدون توقف ، وبعدها يسبحوا في بدلة فضائية وجزم تينس بدون حد زمني لمسافة 75 متر. هذا الأمر في حال واجه رواد الفضاء هبوط اضطراري على الموية. وأخيراً لازم يجتازوا اختبار انهم يظلو عايمين فوق الموية لمدة عشرة دقايق وهم لابسين بدلة الطيران البرتقالية هديك. رواد الفضاء المختارين لازم يعدّوا من الإختبارات هذه كلها.

أحد البرامج التدريبية اللي لازم يعدو منها هي اختبار الضغط العالي او الضغط المنخفض. في المحطة الفضائية الدُولية دائماً رواد الفضاء يتعرضوا لانخفاض الضغط الجوي داخل المحطة ، فعشان كدة في البرنامج التدريبي المخصص لتجهيز رواد الفضاء المُختارين لازم يِنحطوا في بيئة ضغطها الجوي منخفض أو مرتفع وبعدين يعطوهم مشكلة لازم يحلوها او عطل لازم يصلحوه عشان يتعودوا لدرجة ما على العمل تحت ضغوط جوية مختلفة. لازم يعتادوا العمل في بيئات مشابهة.

أحد التدريبات كمان اللي الرواد الفضاء المُرَشّحين لازم يمرّوا مِنها هي تدريب فقدان الوزن ، وفيه طيارة مجهزة بشكل خاص تطلع لارتفاع عالي وبعدها تنزل بقوة لتحت بحيث تجعل الكل في سقوط حر لمدة 20 ثانية ، وهذا الشيء بيتكرر 40 مرة خلال اليوم الواحد. المتدربين لازم يتعودا على التحرك والتصرف في البيئة منعدمة الوزن.

قبل الأخير ، لازم على كل المتدربين ال 14 انهم يتعلموا اللغة الروسية ويتقنوها بالكامل خلال السنتين اللي يقضوها في تجهيزهم. وهذا بسبب انه نص اجزاء المحطة الفضائية العالمية روسية ، وكمان ناسا دايما ترسل روادها على متن صواريخ روسية. ونفس الشيء الروس لازم يتعلمو الانجليزية عشان يعرفو يتواصلوا مع بعض.

آخر شي , كل واحد من رواد الفضاء المختارين الـ 14 راح يتم اكمال تقييمهم النهائي ، وبناء على أداءهم في هذه الإختبارات كلها بيتحدد مين راح يطلع الفضاء ، ومين بيظل على الأرض. يعني اجتيازه لكل هذه الاختبارات ماتعني انه المتقدم راح يتم اختياره للطيران في الفضاء على متن صاروخ سبيس اكس في كبسولة دراقون كرو او على متن الصواريخ الروسية ، بل لازم يكون أفضل شخص يتجاوزها بين كل المتدربين. 

مِن المُختارين النهائيين الـ 14 ، أي واحد يجتاز هذه الاختبارات كلها ويكون تقييمه كويس ، راح يصير موظّف حكومي بكامل مزاياه ويصير رسمياً رائد فضاء مدرب جاهز لأي مهمة ، ورواد الفضاء المختارين اللي تقييمهم كان مو كويس أو كان أقل من المنتسبيين الثانيين ، ناسا راح توزعهم في باقي فروعها على عقد يتجدد سنوياً وحيسيروا يشتغلوا في ناسا ومعاملها , ولكن لن يكونوا موظفين حكوميين فدراليين.

لاتفقد الأمل كلياً ، لأنه لو كنت سعودي وحالياً مُبتعث على حسابك الشخصي ، من الممكن التقديم على برنامج الابتعاث الخارجي على حساب الهيئة الفضائية في التخصصات العلمية المطلوبة ، امثال الهندسة الجوية أو هندسة الطيران ونحو ذلك.

<a href="<!– wp:paragraph –> <p>رابط التقديم: <a href="https://saudispace.gov.sa/projects-ar/scholarship/">https://saudispace.gov.sa/projects-ar/scholarship/</a></p&gt;
صورة لموقع الهيئة السعودية للفضاء – صفحة برنامج الابتعاث الخارجي

رابط التقديم: https://saudispace.gov.sa/projects-ar/scholarship/

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s